வேலூர்: காட்டுப்பன்றி இறைச்சி.. விவசாயிக்கு ரூ. 20 ஆயிரம் அபராதம்
வேலூர் மாவட்ட வன அலுவலர் குருசாமி தபலா உத்தரவின் பேரில் பேரணாம்பட்டு வனச்சரக அலுவலர் சதிஷ்குமார் தலைமையில் வனவர்கள் மாதேஷ்வரன், இளையராஜா வனக்காப்பாளர்கள் அரவிந்தசாமி, சக்தி, ரமேஷ் வனக்காவலர் ரவி ஆகியோர் பேரணாம்பட்டு வனச்சரகம் எர்த்தாங்கல் கலர்பாளையம் கிராமத்தில் ரோந்து பணியில் ஈடுபட்டனர். அப்போது கலர்பாளையம் மலையடிவார பகுதியில் விவசாய நிலத்தில் காட்டுப் பன்றியின் இறைச்சியை ஒருவர் வெட்டிக் கொண்டிருப்பதாக தகவல் கிடைத்தது. வனத்துறையினர் உடனடியாக அங்கு சென்று சோதனையிட்டனர். அப்போது சம்பத் (வயது 70) என்ற விவசாயி காட்டுப்பன்றியின் இறைச்சியை வெட்டிக் கொண்டிருந்தார். அவரிடம் வனத்துறையினர் விசாரணை செய்ததில் வனப்பகுதியையொட்டி விவசாய நிலத்தில் காட்டுப்பன்றி இறந்து கிடந்ததாக தெரிவித்தார். இதையடுத்து அவரிடம் இருந்து 2 கிலோ காட்டுப்பன்றி இறைச்சியை பறிமுதல் செய்து அவருக்கு மாவட்ட வன அலுவலரின் உத்தரவுப்படி ரூ. 20 ஆயிரம் அபராதம் விதிக்கப்பட்டது.
