வீட்டு மாடியில் கேஸ் சிலிண்டர் வெடித்து பரபரப்பு
சுவாமிமலையில் உள்ள சர்வமானிய தெருவில் உள்ள முராரி காலனியில் வசிப்பவர் ராமானுஜம் மனைவி திலகவதி வயது (60). இவர் திருச்சியில் உள்ள உறவினர் வீட்டுக்கு சென்றார். அதற்கு முன்பு வீட்டின் கீழ் பகுதியை காலி செய்து மாடியில் தகர கொட்டகை அமைத்து பொருட்களை வைத்து விட்டு சென்றார். நேற்று(செப்.25) மதியம் திடீரரென்று திலகவதியின் வீட்டு மாடியில் தீ விபத்து ஏற்பட்டு வெடிப்பதுபோல் சத்தம் கேட்டது. இந்த தீ விபத்து நடைபெற்ற இடத்திற்கு சென்று திமுக நகர செயலாளர் பாலசுப்பிரமணியன் பேரூராட்சி மன்ற தலைவர் வைஜெயந்தி, பேரூராட்சி மன்ற உறுப்பினர் குணாளன் உள்ளிட்ட பொதுமக்கள் பார்த்தபோது மாடியில் தீப்பிடித்து எரிந்து கொண்டிருந்தது. தகவல் அறிந்து வந்த சுவாமிமலை காவல் நிலைய ஆய்வாளர் மலைச்சாமி, கும்பகோணம் தீயணைப்பு அலுவலர் பாலசுப்பிரமணி ஆகியோர் தீயணைப்பு படையினருடன் சேர்ந்து தீயை அணைத்தனர். அதன்பிறகு வீட்டை பார்த்த போது வீட்டிலிருந்த ஒரு சிலிண்டர் வெடித்திருந்தது, மற்ற பொருட்கள் கருகிய நிலையில் இருந்தது. எப்படி சிலிண்டர் வெடித்தது என்று சுவாமி மலை போலீஸார் விசாரணை நடத்தி வருகின்றனர். கிராம நிர்வாக அலுவலர் மாரியப்பன், உதவியாளர் சீனிவாசன் சேதமதிப்புகளை கணக்கெடுத்தனர். வீட்டில் ஆட்கள் இல்லாததால் பெரும் சேதம் தவிர்க்கப்பட்டது என்று போலீஸார் தெரிவித்தனர்.
