கோவை: மாணவரை கிரிக்கெட் பேட்டால் தாக்கிய 4 பேர் மீது வழக்கு
கோவை டாடாபாத் சிவானந்தா காலனி 3வது தெருவை சேர்ந்தவர் ஸ்ரீ அய்யப்பன் (23). இவர் கோவையில் உள்ள தனியார் கல்லூரியில் 2ம் ஆண்டு படித்து வருகிறார். இந்நிலையில், கடந்த 2ம் தேதி கல்லூரி நிர்வாகம் சார்பில், மாணவ-மாணவிகளை கல்வி சுற்றுலாவுக்கு பெங்களூரு அழைத்து சென்றனர். அப்போது சில மாணவர்கள், கல்லூரி மாணவிகளுடன் தகராறு செய்தனர். இதனை ஸ்ரீ அய்யப்பன் கல்லூரி நிர்வாகத்தின் கவனத்துக்கு கொண்டு சென்றார். அதன்பின்பு கல்லூரி மாணவர்கள் ஆனந்த் உட்பட 4 பேரை கல்லூரி நிர்வாகம் சஸ்பெண்ட் செய்தது. இதனால் அவர்கள் ஸ்ரீ அய்யப்பன் மீது ஆத்திரத்தில் இருந்தனர். இந்நிலையில், நேற்று முன்தினம் ஸ்ரீ அய்யப்பன் கல்லூரி அருகே நின்றிருந்தார். அப்போது அங்கு வந்த கல்லூரியில் இருந்து சஸ்பெண்ட் செய்யப்பட்ட மாணவர்கள் சிலர் ஸ்ரீ அய்யப்பனை கிரிக்கெட் பேட்டால் தாக்கினர். பின்னர் அவரை மிரட்டி விட்டு சென்றனர். இதுகுறித்து ஸ்ரீ அய்யப்பன் பீளமேடு போலீசில் புகார் அளித்தார். புகாரின் பேரில், போலீசார் கல்லூரி மாணவர்கள் ஆனந்த் உட்பட 4 பேர் மீது வழக்குப்பதிவு செய்து விசாரித்து வருகின்றனர்.
