திருப்பத்தூர்: மின்சாரம் தாக்கி ஒப்பந்த பணியாளர் உயிரிழப்பு

திருப்பத்தூர் அடுத்த பூரிகமாணிமிட்டா பகுதியைச் சேர்ந்த கோவிந்தன் மகன் மாரி வயது 45. இவர் கதிரிமங்கலம் பகுதியில் உள்ள மின்துறை அலுவலகத்தில் ஒப்பந்த பணியாளராக ஏழு வருட காலமாக பணியாற்றி வருகிறார். 

இந்த நிலையில் கதிரிமங்கலம் பகுதியில் திடீரென மின்சார கம்பம் பழுதாகி மின்சாரம் துண்டிக்கப்பட்ட நிலையில் மின்சார கம்பத்தை சரி செய்ய எந்த ஒரு அதிகாரிகளுக்கும் தகவல் தெரிவிக்காமல் மாரி மின்சார கம்பத்தை பழுதனை சரி செய்ய மின் கம்பத்தில் ஏறியதாக தெரிகிறது. அப்போது திடீரென மின்சாரம் தாக்கியதில் தூக்கி வீசப்பட்டு மாரி கீழே விழுந்தார். 

இதில் மாரி சம்பவ இடத்திலேயே பரிதாபமாக உயிரிழந்தார். பின்னர் அப்பகுதி மக்கள் திருப்பத்தூர் கிராமிய போலீசருக்கு தகவல் தெரிவித்தனர். உடலை மீட்டு பிரேத பரிசோதனைக்காக திருப்பத்தூர் அரசு தலைமை மருத்துவமனைக்கு அனுப்பி வைத்தனர். 

மின்சார கம்பத்தில் பழுது காரணமாக சரி செய்ய முயன்ற ஒப்பந்த பணியாளர் மின்சாரம் தாக்கி உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.