தர்மபுரி: பள்ளி நூற்றாண்டு நிகழ்ச்சியை தொடங்கி வைத்த ஆட்சியர்
தருமபுரி மாவட்டம், நல்லம்பள்ளி வட்டம், அதியமான்கோட்டை ஊராட்சி ஒன்றிய தொடக்கப்பள்ளி தொடங்கி (1893-2025) நூற்றாண்டுகளை கடந்துள்ளதை சிறப்பிக்கும் வகையில் நடைபெற்ற நூற்றாண்டு நிகழ்ச்சியினை மாவட்ட ஆட்சித்தலைவர் ரெ. சதீஸ். குத்துவிளக்கேற்றி, தொடங்கி வைத்தார். ஆட்சியர் நூற்றாண்டு உறுதிமொழியான "கல்வி எங்களின் அடிப்படை உரிமை. எங்களின் அடிப்படை உரிமையை எங்களுக்கு உறுதிசெய்தது எங்களின் அரசுப் பள்ளியே, அரசுப் பள்ளியே நம் அடையாளம். அதுவே நம் வழிகாட்டி நம் ஆசிரியர்களே நம் கலங்கரை விளக்கம். அனைவருக்கும் சமத்துவமான கல்வியை சமூக நீதியுடன் உறுதிசெய்த அரசுப்பள்ளியின் வளர்ச்சி என்பது நம் அனைவரின் கூட்டுப் பொறுப்பு, பள்ளியின் வளர்ச்சிக்குத் துணை நிற்பதை உதவியாகக் கருதாமல் நம் கடமையாகக் கருதுவோம். நம் பள்ளியின் மேம்பாட்டிற்காக ஒருங்கிணைந்து செயல்படுவோம். கல்வி என்னும் பயணத்தில் தன்நம்பிக்கையை கனவுகளை சமூகநீதியை, சுதந்திரத்தை நமக்கு அளித்த நம் அரசுப்பள்ளிகளுடன் உடன் நிற்போம் என்று இந்நூற்றாண்டுத் திருவிழாவில் அனைவரும் இணைந்து உறுதியேற்போம்." "நம் பள்ளி நம் பெருமை. நம் பள்ளி நம் பொறுப்பு" என்ற உறுதிமொழியை வாசிக்க அனைவரும் பின்தொடர்ந்து வாசித்து உறுதிமொழி ஏற்றுக்கொண்டனர். முன்னாள் மாணவர்கள் சார்பில் இப்பள்ளியில் பயிலும் மாணவ, மாணவியர்களுக்கு பரிசுகளை மாவட்ட ஆட்சித்தலைவர் ரெ. சதீஸ் வழங்கினார்.
