கோவை: ரயில் மோதி உடல் 2 துண்டாகி வாலிபர் பலி
திருவனந்தபுரத்தில் இருந்து டெல்லி நோக்கி செல்லும் கேரள எக்ஸ்பிரஸ் ரயில் நேற்று அதிகாலை கோவை நோக்கி வந்து கொண்டிருந்தது. ரயில் பீளமேடு அருகே வந்தபோது ஒரு வாலிபர் தண்டவாளத்தை கடக்க முயன்றதாக தெரிகிறது. அப்போது ரயில் மோதி அந்த வாலிபரின் உடல் 2 துண்டானது. உடலின் ஒரு பாதி தண்டவாளம் அருகிலும், ஒரு பாதி ரயிலின் இன்ஜினில் மாட்டி கொண்டது. ரயில் சுமார் 2 கி. மீ தூரம் சென்றபின் இன்ஜின் டிரைவர் கோவை ரயில்வே போலீசாருக்கு தகவல் கொடுத்தார். அதன்பின்பு ரயில் ராமானுஜம் நகர் பகுதியில் நிறுத்தப்பட்டது. சம்பவ இடத்துக்கு வந்த போலீசார் இன்ஜினில் சிக்கியிருந்த வாலிபரின் உடலை மீட்டனர். பின்னர் தண்டவாளம் அருகே சிதறி கிடந்த மீதி உடலை மீட்டனர். சுமார் 30 வயது மதிக்கத்தக்க அந்த வாலிபர் யார்? எந்த ஊர் என்பது குறித்த விவரம் தெரியவில்லை. இந்த சம்பவம் குறித்து கோவை ரயில்வே போலீசார் வழக்குப்பதிவு செய்து அந்த வாலிபர் தண்டவாளத்தை கடக்க முயன்றபோது ரயில் மோதி பலியானாரா? அல்லது தற்கொலையா? என விசாரித்து வருகின்றனர்.
