காரில் போதைப்பொருள் கடத்தல்: இளைஞர் கைது

வேலூர் மாவட்டம் குடியாத்தம் அடுத்த பேரணாம்பட்டு அருகே பக்காலப்பல்லி கூட்டு ரோட்டில் பேரணாம்பட்டு போலீசார் தீவிர வாகன சோதனையில் ஈடுப்பட்டனர். இந்த வாகன சோதனையில் வேகமாக வந்த ஒரு சொகுசு காரை போலீசார் தடுத்து நிறுத்தி சோதனையிட்டனர். அதில் மெத்தாபேட்டமைன் எனும் போதை பொருள், கண்ணாடி குடுவை, குழாய்களுடன் கூடிய மூன்று குப்பிகள், லைட்டர்கள் இருப்பது தெரியவந்தது.

காரில் பயணம் செய்த பேரணாம்பட்டு பகுதியை சேந்த மன்சூரலி (24) என்பவர் பெங்களூரிலிருந்து போதை பொருட்களை கடத்தி கொண்டு பேரணாம்பட்டு பகுதிக்கு வந்தது விசாரணையில் தெரியவந்தது. இவரிடமிருந்து சுமார் 1.05 மில்லி கிராம் எடையுள்ள மெத்தாபேட்டமைன் போதை பொருள், கண்ணாடி குடுவை, குப்பிகள், லைட்டர்கள், கார் ஆகியனவற்றை பறிமுதல் செய்து மன்சூரலியை கைது செய்தனர். மன்சூரலிக்கு இந்த போதை பொருள் எப்படி கிடைத்தது. வேறு யாருக்கு தொடர்பு உள்ளது என பேரணாம்பட்டு போலீசார் தீவிரமாக விசாரணை நடத்தி வருகின்றனர்.