பிரபல ரவுடி வசூர் ராஜாவின் கூட்டாளிகள் 6 பேர் கைது

வேலூர் மாநகர் சத்துவாச்சாரி பேஸ்-1 பகுதியைச் சேர்ந்தவர் தங்கராஜ் (47). இவர் பழைய கட்டிடங்களை இடிக்கும் தொழில் செய்து வருகிறார். இந்நிலையில் கடந்த 19ஆம் தேதி வீட்டின் பின்புறம் உள்ள மலை அடிவாரத்தில் முனீஸ்வரன் கோவில் அருகே ஒரு மரத்தில் மர்மமான முறையில் தங்கராஜ் தூக்கில் தொங்கியபடி மீட்கப்பட்டார்.

சாவில் மர்மம் இருப்பதாகவும், ரவுடி வசூர் ராஜாவின் கூட்டாளிகள் பணம் கேட்டு மிரட்டி தாக்கியதாகவும் தங்கராஜ் உறவினர்கள் காவல் நிலையத்தில் புகார் அளித்தனர்.

அதன் பேரில் தனிப்படை போலீசார் தீவிர விசாரணை நடத்தி வந்த நிலையில், சுமார் 30 லட்சம் ரூபாய் பணம் கேட்டு தாக்கியதோடு தங்கிராஜிடமிருந்து மோதிரத்தை பறித்துச் சென்றதாக பிரபல ரவுடி வசூர் ராஜா உள்ளிட்ட ஏழு பேர் மீது சத்துவாச்சாரி போலீசார் வழக்கு பதிவு செய்துள்ளனர்.

பின்னர் முக்கிய குற்றவாளியான வசூர் ராஜாவின் மைத்துனர் விக்ரம் மற்றும் கூட்டாளிகள் நரேஷ், அருண்குமார், இம்தியாஸ், திலீப் மற்றும் யோகேஷ் ஆகிய 6 பேரை கைது செய்த போலீசார் நீதிமன்ற காவலில் வேலூர் மத்திய சிறையில் இன்று அடைத்துள்ளனர். மேலும் பிரபல ரவுடி வசூர் ராஜா வேலூர் மத்திய சிறையில் உள்ள நிலையில் அவரையும் கைது செய்ய உள்ளதாக சத்துவாச்சாரி இன்ஸ்பெக்டர் லதா தெரிவித்துள்ளார்.