மாணவர்களை தாக்கும் ரவுடிகள் வைரலாகும் சிசிடிவி காட்சிகள்

நாகை மாவட்டம், திருமருகல் ஒன்றியம், அக்கரை சகடமங்கலம் பகுதியைச் சேர்ந்த விஷ்வா என்ற மாணவர் திருவாரூர் மாவட்டம், பூந்தோட்டம் அரசினர் மேல்நிலைப் பள்ளியில் 11-ஆம் வகுப்பு படிக்கிறார். இவருடைய சகோதரர் ராகவன் தொழில் படிப்பு படித்து வருகிறார். மேலும் பூந்தோட்டம் அருகே உள்ள கொத்தவாசல் பகுதியைச் சேர்ந்த அபின் பூந்தோட்டம் அரசு மேல்நிலைப் பள்ளியில் 11-ஆம் வகுப்பு படித்து வருகிறார். இந்த நிலையில்,
கடந்த பத்தாம் தேதி மாலை பள்ளி முடிந்ததும் விஷ்வாவும் ராகவனும் அபின் என்ற மாணவரிடம் வாக்குவாதம் செய்ததாக கூறப்படுகிறது. இதைக் கண்ட பூந்தோட்டம் கொத்தவாசல் பகுதியைச் சேர்ந்த அபின் தரப்பினர் பத்துக்கும் மேற்பட்டோர் விசுவாவையும், ராகவனையும் கடுமையாக தாக்கியுள்ளனர்.

இதைக் கண்ட பள்ளியின் சக மாணவர்கள், பொதுமக்கள் செய்வது அறியாமல் அங்கும் இங்கும் பதற்றத்துடன் ஓடி உள்ளனர். இந்த காட்சிகள் தற்பொழுது சமூக வலைதளங்களில் வைரலாக பரவி வருகிறது. இந்த நிலையில் மாணவர்களை தாக்கிய
தென்னவன், கலைமணி, ஹரி கிருஷ்ணன், உள்ளிட்ட நான்கு பேர் மீது பேரளம் காவல்துறையினர் வழக்கு பதிவு செய்து கைது செய்தனர்.

பாதிக்கப்பட்ட மாணவன் விஷ்வா திருவாரூர் அரசு மருத்துவ கல்லூரி மருத்துவமனையில் சிகிச்சை பெற்று வருகிறார். மேலும் இதுகுறித்து காவல்துறையினர் விசாரணை மேற்கொண்டு வருகின்றனர்.