நன்னிலத்தில் கொள்முதல் நிலையங்களில் நெல் மூட்டைகள் தேக்கம்
நன்னிலம் மற்றும் அதனை சுற்றியுள்ள பகுதியில் நேரடி நெல் கொள்முதல் நிலையங்களில் விவசாயிகளிடமிருந்து கொள்முதல் செய்த நெல், மூட்டைகளாக அடுக்கி வைத்திருக்கும் நிலை உள்ளது. திருவாரூர் மாவட்ட பகுதிகளில் விவசாயிகளிடமிருந்து நெல்லை கொள்முதல் செய்ய நேரடி நெல் கொள்முதல் நிலைகள் திறக்கப்பட்டு கொள்முதல் செய்யப்பட்டு வருகிறது. மேலும் விவசாயிகளிடமிருந்து ஒரு நாளைக்கு 800 முதல் 900 மூட்டைகள் வரை தான் கொள்முதல் செய்யப்பட்டு வருகிறது. இந்த நிலையில் மாவட்டத்தில் பல இடங்களில் விவசாயிகளிடமிருந்து கொள்முதல் செய்யப்பட்ட நெல் மூட்டைகளாக, கொள்முதல் நிலையங்களில் அடுக்கி வைக்கப்பட்டுள்ளது. இதனால் விவசாயிகள் அறுவடை செய்து கொண்டுவரும் நெல்லை அடுக்கி வைப்பதற்கும் காய வைப்பதற்கும் இடமில்லாமல் உள்ளது என விவசாயிகள் கூறுகின்றனர். கொள்முதல் செய்யப்பட்ட நெல்மூட்டைகள் லாரிகள் மூலம் எடுத்து செல்லப்பட்டு சேமிப்பு கிடங்குகளுக்கும், நவீன அரிசி ஆலைகளுக்கும் அனுப்பப்படும். ஆனால், பல நேரடிநெல் கொள்முதல் நிலையங்களில் நெல் மூட்டைகளை எடுத்துச் செல்லாமல் அங்கேயே அடுக்கி வைத்துள்ளதால் கால்நடைகள் மற்றும் இயற்கை இடர்பாடுகளால் நெல் மூட்டைகள் பாதிக்கப்படும் நிலை உள்ளது. எனவே, மாவட்ட நிர்வாகம் உடனடியாக தேங்கி இருக்கும் நெல் மூட்டைகளை உரிய இடங்களுக்கு அனுப்ப நடவடிக்கை எடுக்க வேண்டும் என விவசாயிகள் கோரிக்கை வைக்கின்றனர்.
