ஒரத்தநாடு: மழையால் இடிந்து விழுந்த வீடு..விவசாயி படுகாயம்
திருவோணம் அருகே நேற்று பெய்த கனமழையில் ஓட்டுவீடு இடிந்து விழுந்து காயமடைந்த விவசாயியை, தஞ்சை மருத்துவக் கல்லூரி மருத்துவமனை அனுமதித்துள்ளனர். டெல்டா மாவட்டங்களில் கடந்த சில நாட்களாக பலத்த மழை பெய்து வருகிறது. இதில், தஞ்சாவூர் மாவட்டம், திருவோணம் அருகே உள்ள கிழாமங்கலம் கிராமம் வாழைத் தோட்டம் தெருவில் வசிக்கும் அய்யாவு மகன் சுப்பிரமணியன் (58) குத்தகை விவசாயி. இவர், நேற்று மதியம் தனது வீட்டில் உறங்கிக்கொண்டிருந்தார். அப்போது, பெய்த கனமழையில் ஓட்டுவீடு திடீரென இடிந்து விழுந்தது. இதில், உள்ளே உறங்கிக் கொண்டிருந்த சுப்பிரமணியன் அலறும் சத்தம் கேட்டது. இதையறிந்து, அக்கம்பக்கத்தினர் சென்று, இடிபாடுகளில் சிக்கி இருந்த சுப்பிரமணியனை மீட்டு 108 ஆம்புலன்ஸ் மூலம் தஞ்சை மருத்துவக் கல்லூரி மருத்துவமனைக்கு சிகிச்சைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. மேலும் சம்பவ இடத்திற்கு திருவோணம் வட்டாட்சியர் முருகவேல், வருவாய் ஆய்வாளர் ஜெயரத்தினம், கிழாமங்கலம் கிராம நிர்வாக அலுவலர் தமிழாசன் உள்ளிட்ட வருவாய் துறையினர் சம்பவ இடத்திற்கு நேரில் சென்று விசாரணை நடத்தி வருகின்றனர்.
