தஞ்சாவூர் ரயில்வே கீழ்பாலத்தில் தேங்கும் மழைநீரை அகற்ற ஆய்வு

தஞ்சாவூர் ரயில்வே கீழ்பாலத்தில் தேங்கும் மழைநீரை அகற்ற மேற்கொள்ளப்படும் பணிகள் தொடர்பாக திருச்சி கோட்ட ரயில்வே மேலாளருடன், தஞ்சாவூர் நாடாளுமன்ற உறுப்பினர் நேரில் ஆய்வு செய்தார்.
தஞ்சாவூர் ரயில் நிலையத்தில் அம்ரித்பாரத் திட்டத்தின் கீழ் பல்வேறு புனரமைப்பு பணிகள் நடைபெற்று வருகின்றன. இந்த பணிகளை விரைவாக முடிப்பது குறித்தும், 2-ஆவது கட்டமாக மேற்கொள்ள வேண்டிய பணிகள் குறித்தும் திருச்சி கோட்ட ரயில்வே மேலாளர் அன்பழகன் மற்றும் அதிகாரிகளுடன் தஞ்சாவூர்  
எம். பி. , ச. முரசொலி ஆய்வு மேற்கொண்டார்.

அப்போது தஞ்சாவூர் ரயில் நிலையத்தின் பின்பகுதியில் 2- ஆவது கட்டமாக சீரமைப்பு பணிகளை மேற்கொள்ள வேண்டும். 1-ஆவது நடைமேடையில் நிழற்கூரை இல்லாத இடங்களில் நிழற்கூரை அமைக்க வேண்டும். 2, 3-ஆவது நடைமேடைகளில் பயணிகளுக்கு காத்திருப்பு அறை அமைக்க வேண்டும். ரயில்வே காவல் நிலையம் நடைமேடையை விட தாழ்வான பகுதியில் இருப்பதால் மழை காலங்களில் தண்ணீர் புகுந்து விடுவதால், காவல் நிலையத்துக்கு மாற்று இடம் ஏற்பாடு செய்ய வேண்டும்" என முரசொலி எம். பி கேட்டுக்கொண்டார்.

பின்னர் தஞ்சாவூர் மேரீஸ் கார்னர் ரயில்வே கீழ்பாலத்தை, அதிகாரிகளுடன் சென்று பார்வையிட்டார். அப்போது மழை காலங்களில் தண்ணீர் தேங்காமல் இருக்க, நெடுஞ்சாலைத்துறை மற்றும் ரயில்வே அதிகாரிகள் இணைந்து தேவையான நடவடிக்கை மேற்கொள்வது குறித்து ஆய்வு செய்யப்பட்டது.