புவனகிரி: வாலிபரை தாக்கிய 3 பேர் கைது
புவனகிரி முள்ளிப்பள்ளம் தெருவை சேர்ந்தவர் முத்துலிங்கம் மகன் விஜயகுமார். இவருக்கும் அதே ஊரை சேர்ந்த சங்கர் மகன் நீலகண்டன் என்பவருக்கும் இடையே தகராறு ஏற்பட்டு முன் விரோதம் இருந்து வருகிறது. இந்த நிலையில் சம்பவத்தன்று விஜயகுமார் தனது வீட்டில் இருந்தார். அப்போது அங்கு வந்த நீலகண்டன், ஜோதிமணி மகன்கள் துளசிமணி, செல்வமணி மற்றும் கவிமணி ஆகியோர் கொண்ட கும்பல் ஒன்று சேர்ந்து விஜயகுமாரை சரமாரியாக தாக்கியதாக கூறப்படுகிறது. அப்போது தடுக்க முயன்ற விஜயகுமாரின் அத்தை அன்புமணி என்பவரையும் 4 பேர் கொண்ட கும்பல் கல்வீசி தாக்கிவிட்டு சென்றதாக தெரிகிறது. இந்த தாக்குதலில் காயமடைந்த 2 பேரும் அரசு ஆஸ்பத்திரியில் சிகிச்சை பெற்று வருகிறார்கள். மேலும் இந்த சம்பவம் குறித்து விஜயகுமார் கொடுத்த புகாரின் பேரில் கவிமணி உள்ளிட்ட 4 பேர் மீது புவனகிரி காவல் துறையினர் வழக்குப் பதிவு செய்து நீலகண்டன், துளசிமணி, செல்வமணி ஆகியோரை கைது செய்தனர். தலைமறைவாக உள்ள கவிமணியை தேடி வருகின்றனர்.
