சென்னை: நடிகை சீதா வீட்டில் நகை திருட்டு: போலீஸார் விசாரணை
நடிகை சீதாவின் வீட்டில் 4 1/2 பவுன் நகை திருடப்பட்டுள்ளது. இச்சம்பவம் குறித்து சீதா கொடுத்த புகாரின் பேரில் போலீசார் விசாரணை மேற்கொண்டு வருகின்றனர். தமிழ் சினிமாவில் 'ஆண்பாவம்' திரைப்படத்தின் மூலம் அறிமுகமானவர் நடிகை சீதா. விஜயகாந்த் உள்ளிட்ட பல முன்னணி நடிகர்களுக்கு ஜோடியாக நடித்து பிரபலமானவர். பின்னர் நடிகர் பார்த்திபனை காதலித்து திருமணம் செய்து கொண்டார். பின்னர் கருத்து வேறுபாடு காரணமாக பிரிந்தனர். தற்போது குணச்சித்திர வேடங்களில் நடித்து வருபவர் சீதா, விருகம்பாக்கம் புஷ்பா காலனியில் வசித்து வருகிறார். இந்நிலையில் விருகம்பாக்கம் காவல் நிலையத்தில் அவர் புகார் ஒன்றை அளித்துள்ளார். கடந்த அக்டோபர் 31ஆம் தேதி, தனது தம்பியின் மனைவி கல்பனா, விசேஷம் ஒன்றுக்கு சென்றுவிட்டு வீட்டுக்கு வந்தார். அவர், அணிந்திருந்த 4 1/2 பவுன் நகைகளை வீட்டில் கழற்றி வைத்துவிட்டு உறங்கிவிட்டார். பின்னர், எழுந்து பார்த்தபோது அந்த நகைகள் மாயமாகி விட்டன. எனவே தனது வீட்டில் திருடு போன அந்த நகையை கண்டுபிடித்து தரவேண்டும் என்று அந்த புகாரில் கூறியிருந்தார். இந்த புகார் குறித்து வழக்குப்பதிவு செய்துள்ள போலீசார் அந்த பகுதியில் உள்ள கண்காணிப்பு கேமரா பதிவுகளை ஆய்வு செய்து நகை திருடியவரை தேடி வருகின்றனர். மேலும் சீதா வீட்டில் வேலை பார்த்து வரும் பணிப்பெண்ணிடமும் போலீசார் தீவிர விசாரணை மேற்கொண்டு வருகின்றனர்.
