சிவகாசி: பங்குனி பொங்கல் கொடியேற்றத்துடன் திருவிழா தொடக்கம்.

சிவகாசியில் பிரசித்தி பெற்ற ஸ்ரீமாரியம்மன் கோவிலில் பங்குனி திருவிழா.
கொடியேற்றத்துடன் தொடக்கம்.
விருதுநகர் மாவட்டம், சிவகாசியில் பிரசித்தி பெற்ற அருள்மிகு
ஸ்ரீமாரியம்மன் கோவில் பங்குனிப் பொங்கல் திருவிழா திரளான பக்தர்கள் கலந்து கொள்ள, குலவை ஒலியுடன், ஓம் சக்தி- பராசக்தி எனும் சரண கோஷத்தோடு கொடியேற்றத்துடன் தொடங்கியது. முன்னதாக கீழரதவீதியிலுள்ள கடைக் கோவிலிலிருந்து சிம்மவாகனத்தில் சர்வ அலங்காரத்தோடு ரதத்தின் மேல் எழுந்தருளி கிளம்பிய மாரியம்மன், விநாயகர் ரதம் முன்னே செல்ல, நகரின் முக்கிய சாலைகளின் வழியாக சென்று மாரியம்மன் கோவில் வளாகத்தை வந்தடைந்தது. மாரியம்மன் கோவில் வளாகத்தை சுற்றிலும் வண்ண- வண்ண மின் விளக்குகளால் அலங்கரிக்கப்பட்டிருக்க, திரளான பக்தர்களின் கோஷத்துடன் கொடியேற்றத்தோடு முதலாம் நாள் திருவிழா தொடங்கியது. பங்குனி பொங்கல் திருவிழாவை தொடர்ந்து தினமும் ஒவ்வொரு மண்டகப்படிதாரர் கள் உபயமளிக்க, அன்றாடம் மாரியம்மன் வெள்ளி ஊஞ்சலிலும், சிம்மம், காமதேனு, கைலாச பர்வதம், வேதாளம், வெள்ளிரிஷபம், யானை, குதிரை, அன்னம் போன்ற வாகனங்களிலும், புஷ்பபல்லக்கிலும் சர்வ அலங்காரத்தோடு ரதத்தில் எழுந்தருளி, காலை மற்றும் இரவு வேளைகளில் முக்கிய சாலை களில் வலம் வந்து பக்தர்களுக்கு காட்சி தந்து அருளாசி வழங்கும் நிகழ்ச்சிகளும் நடைபெறும்.