கோவில்பட்டியில் 2 மணி நேரம் தொடர் மழை

தூத்துக்குடி மாவட்டம் கோவில்பட்டி நகர் பகுதியில் கடந்த சில தினங்களாக வெயிலின் தாக்கம் சற்று இருந்தாலும் அவ்வப்போது சாரல் மழையும் பெய்து வந்தது. நேற்று காலையில் லேசான சாரல் மழை பெய்தது. இந்த நிலையில் இன்று அதிகாலை 3 மணி முதல் பலத்த மழை பெய்து வருகிறது.

 கோவில்பட்டி நகர் மட்டுமின்றி கழுகுமலை, வானரமுட்டி, குளத்தூர், நாலாட்டின்புதூர், இளையரசனேந்தல், இனாம்மணியாச்சி, திட்டங்குளம், மூப்பன்பட்டி, இலுப்பையூரணி உள்ளிட்ட பகுதிகளிலும் தொடர்ந்து மழை பெய்து வருகிறது. 2 மணி நேரத்திற்கு மேலாக மழை பெய்து வருவதால் கோவில்பட்டி இளையரசனேந்தல் சாலையில் உள்ள ரயில்வே சுரங்கப் பாலத்தில் மழைநீர் தேங்கியுள்ளதால் வாகனஓட்டிகள் மிகுந்த சிரமத்துடன் சென்று வருகின்றனர்.