சேலத்தில் கஞ்சா விற்ற 11 பேர் கைது

சேலம் டவுன் போலீஸ் சப்-இன்ஸ்பெக்டர் மஞ்சுளா தலைமையில் போலீசார் கோட்டை பள்ளி அருகே ரோந்து பணியில் ஈடுபட்டனர். அங்கு சந்தேகப்படும்படி நின்று கொண்டிருந்த 4 பேரிடம் போலீசார் விசாரணை நடத்தினர். அவர்கள் தாதகாப்பட்டியை சேர்ந்த தனுலேஷ் (வயது 22), பிரபாகரன் (30), குருமூர்த்தி (26), விஜயகுமார் (33) என்றும், அவர்கள் கஞ்சா விற்பனை செய்ததும் தெரிய வந்தது. இதையடுத்து அவர்கள் 4 பேரை போலீசார் கைது செய்தனர்.
அதேபோன்று சிறப்பு சப்-இன்ஸ்பெக்டர் வெங்கடேசன் தலைமையில் போலீசார் அண்ணா நகர், பழைய பஸ் நிலையம் ஆகிய இடங்களில் ரோந்து பணியில் ஈடுபட்டனர். அப்போது கஞ்சா விற்ற நெத்திமேட்டை சேர்ந்த தங்கராஜ், விஜய் (26), வித்யா (28) உள்பட 7 பேரை போலீசார் கைது செய்தனர். அவர்களிடம் இருந்து கஞ்சா பறிமுதல் செய்யப்பட்டது.