திருமங்கலம்: கொலை வழக்கு குற்றவாளிகள் மீது குண்டர் சட்டம்

மதுரை மாவட்டம் திருமங்கலம் அருகே டி. கல்லுப்பட்டி பிள்ளையார் தெருவில் வசிக்கும் முருகேசன் மகன் மணி என்பவரிடம் மங்கம்மாள்பட்டி ராஜசேகர் (33) என்பவர் டூவீலரை அடமானமாக வைத்து ரூ. 25 ஆயிரம் பெற்றுள்ளார். கடந்த ஜனவரியில் ரூ. 25 ஆயிரத்தை மணியிடம் ராஜசேகர் கொடுத்து அடமானமாக வைத்த டூவீலரை திரும்பப் பெற்றுள்ளார். கொடுத்த பணத்திற்கு வட்டியாக ரூ. 5 ஆயிரம் தரும்படி மணி கேட்டதால் இருவருக்கும் தகராறு ஏற்பட்டுள்ளது. 

இந்நிலையில் கடந்த ஜன. 25ல் மணி, அவரது நண்பர்கள் சரவணன், சங்கர், பூமர்சரவணன் ஆகியோர் டி. கல்லுப்பட்டி-பேரையூர் ரோடு தனியார் மதுபான கூட்டத்திற்கு வந்து ராஜசேகர் மற்றும் பென்னி (27) என்பவரிடம் தகராறு செய்து அரிவாளால் வெட்டினர். இதில் இருவரும் லேசான காயம் அடைந்தனர். இந்நிலையில் இந்த விவகாரம் தொடர்பாக சமாதானம் செய்து கொள்வதாக ராஜசேகர், மணியின் தந்தை முருகேசனிடம் தெரிவித்தார். இதையடுத்து மங்கம்மாள்பட்டி சுடுகாடு அருகே ராஜசேகர் முருகேசனை அழைத்துச் சென்றார். அங்கு முருகேசன், ராஜசேகர், பென்னி மற்றும் மூவர் மது அருந்தினர். 

மது போதையில் தகராறு ஏற்பட்டு முருகேசன் கழுத்தை அறுத்து கொலை செய்து விட்டு உடலை சுடுகாட்டிலும் தலையை டி. கல்லுப்பட்டி டாஸ்மாக் பாரில் போட்டுவிட்டு தப்பினர். இதுகுறித்து ராஜசேகர், பென்னி, விருதுநகர் மாவட்டம் வடமலைக்குறிச்சி விஜய் (25), குச்சம்பட்டி செல்வபாண்டி (25) ஆகியோரை கைது செய்தனர்.