செங்கல்பட்டு: பாக்கத்தில் ஆக்கிரமித்து போடப்பட்டிருந்த கம்பி வேலி அகற்றம்

செங்கல்பட்டு மாவட்டம் மதுராந்தகம் ஒன்றியத்துக்கு உட்பட்ட பாக்கம் ஊராட்சியில், மாரியம்மன் கோவில் தெரு பகுதியில், 40 ஆண்டுகளுக்கு மேலாக, கிராம சாலையை ஆக்கிரமித்து, வீட்டின் முன்பு தனிநபர் மதில் சுவர் எழுப்பியிருந்தார். இந்நிலையில், மாரியம்மன் கோவில் தெருப் பகுதிக்கு, கடந்த 2022-ல், சிமென்ட் சாலை அமைக்க நிதி ஒதுக்கீடு செய்யப்பட்டது. ஆனால், அந்த தெருவில், கடந்த மூன்று ஆண்டுகளாக, சாலை போடப்படாமல் கிடப்பில் போடப்பட்டது. சாலையை ஆக்கிரமித்து, மதில் சுவர் எழுப்பியிருந்ததால், சாலை போட முடியாத நிலை ஏற்பட்டது. அந்த ஆக்கிரமிப்பு குறித்து கிராம மக்கள், கலெக்டரிடம் புகார் அளித்தனர். 

புகாரின் பேரில், வருவாய்த் துறையினர், ஆய்வு நடத்தி, கிராம சாலையை ஆக்கிரமித்திருந்ததை உறுதி செய்தனர். பின், கடந்த சில தினங்களுக்கு முன், ஆக்கிரமிக்கப்பட்ட இடத்தில் அமைக்கப்பட்ட மதில் சுவரை வருவாய்த்துறையினர் மற்றும் மதுராந்தகம் காவல்துறையினர் ஜே.சி.பி., இயந்திரம் வாயிலாக அகற்றினர். பின், ஆக்கிரமிப்பு அகற்றப்பட்ட இடத்தில், மீண்டும், கம்பி வேலி அமைக்கப்பட்டுள்ளது. இது குறித்து, வருவாய்த் துறையினருக்கு கிராம மக்கள் தகவல் அளித்துள்ளனர். தகவலின் பேரில், வருவாய்த் துறை மற்றும் காவல்துறையினர் ஆக்கிரமிப்பு இடத்தில் இருந்த கம்பி வேலியை அகற்றினர்.