திருக்கழுக்குன்றத்தில் தற்காலிக தரை பாலம் சேதம்

செங்கல்பட்டு மாவட்டம், திருக்கழுக்குன்றம் அடுத்த நெரும்பூரில் இருந்து இரும்புலிச்சேரி செல்லும் பாலாற்று மேம்பாலம் கடந்த 2015 ஆம் ஆண்டு பெய்த பெரும் மழை வெள்ளத்தில் ஒரு கிலோமீட்டர் பாலம் பாலாற்றில் அடித்து செல்லப்பட்டது. இதனால் இரும்புலிசேரி, சின்ன எடையாத்தூர், அட்ட வட்டம், சாமியார் மடம், சேவூர் ஆகிய ஐந்து கிராம மக்களுக்கு போக்குவரத்து முற்றிலும் துண்டிக்கப்பட்டது. இதனால் பள்ளி மாணவர்களும் வேலைக்கு செல்பவர்களும் மருத்துவமனை மற்றும் அவசிய தேவைகளுக்கு வெளியில் செல்பவர்களும் செல்ல முடியாமல் மூன்று கிலோ மீட்டரில் செல்ல வேண்டிய பாதை சுமார் 15 கிலோமீட்டர் தூரம் சுற்றி செல்ல வேண்டிய நிலை உருவாகியது, அதனால் மாவட்ட நிர்வாகம் பார்வையிட்டு பாலாற்றின் குறுக்கே சாலை அமைத்து வீராணம் குழாய்களைக் கொண்டு தற்காலிக பாலம் அமைக்கப்பட்டு போக்குவரத்து சரி செய்யப்பட்டது தொடர்ந்து ஆண்டு தோறும் பெய்து வரும் மழையால் கடந்த 9 ஆண்டுகளாக மழைக்காலங்களில் தற்காலிக பாலம் சிதிலமடைந்து போக்குவரத்து துண்டிக்கப்படுவது வழக்கமாகி வருகிறது, பெஞ்சல் புயலின் காரணமாக கடந்த சில தினங்களாக பெய்த கன மழையால் பாலாற்றில் வெள்ளப்பெருக்கு ஏற்பட்டு தற்காலிக பாலமானது நீரில் மூழ்கி உடையும் நிலை ஏற்பட்டுள்ளது இதனால் அப்பகுதியில் போக்குவரத்து முற்றிலுமாக முடக்கப்பட்டுள்ளதால் அப்பகுதி கிராம மக்கள் மிகுந்த வேதனைக்கு உள்ளாகி வருகின்றனர்.