மரத்தின் மீது வேன் மோதிய விபத்தில் மேலும் ஒருவர் பலி

உளுந்துார்பேட்டை அருகே மரத்தின் மீது வேன் மோதிய விபத்தில் மேலும் ஒருவர் இறந்ததால் பலி எண்ணிக்கை 8 ஆக உயர்ந்தது.

ராணிப்பேட்டை மாவட்டம், வாழைப்பந்தல் கிராமத்தைச் சேர்ந்தவர் வசந்தகுமார், 21; டிரைவர். இவர், மகேந்திரா மேக்ஸ் கேப் வேனில் அப்பகுதியைச் சேர்ந்த 23 பேரை ஆன்மிக தலங்களுக்கு சுற்றுலாவாக கடந்த 23ம் தேதி அழைத்துச் சென்றார். திருச்செந்துார் கோவிலுக்கு சென்று திரும்பி வந்த போது, கடந்த 25ம் தேதி அதிகாலை 2: 30 மணியளவில் கள்ளக்குறிச்சி மாவட்டம், உளுந்துார் பேட்டை அடுத்த செரத்தனுார் அருகே தேசிய நெடுஞ்சாலையில் சென்ற வேன் கட்டுப்பாட்டை இழந்து சாலையோர மரத்தில் மோதியது.


இதில், 6 பேர் சம்பவ இடத்திலேயே இறந்தனர். படுகாயமடைந்த 16 பேர் விழுப்புரம் அரசு மருத்துவக் கல்லுாரி மருத்துவமனையில் சேர்க்கப்பட்டனர். அங்கு வெங்கடேசன் மனைவி தனம், 50; இறந்ததால் பலி எண்ணிக்கை 7ஆனது.


இந்நிலையில், மருத்துவமனையில் சிகிச்சையில் இருந்த சுப்ரமணியன், 79; நேற்று இறந்தார். இதனால் வேன் விபத்தில் இறந்தவர்களின் எண்ணிக்கை 8 ஆக உயர்ந்தது.