ஈரோடு: யானை மிதித்து விவசாயி உடல் நசுங்கி பலி
ஈரோடு மாவட்டம் கடம்பூர் அடுத்த குத்தியாலத்தூர், அணைக்கரை, பைரமரத்தொட்டி பகுதியைச் சேர்ந்தவர் மாறன் (55). விவசாயி. இவருக்கு அதே பகுதியில் 5 ஏக்கர் நிலம் உள்ளது. இதில் தற்போது மக்காச்சோளம் பயிரிட்டுள்ளார். பைரமரத்தொட்டி பகுதி அடர்ந்த வனப்பகுதியை ஒட்டியுள்ளது. இங்கு காட்டுப்பன்றிகள் அடிக்கடி தோட்டத்திற்குள் புகுந்து பயிர்களை தின்று சேதப்படுத்தி வருவதால் மாறன் தனது மக்காச்சோள தோட்டத்தில் இரவு நேரங்களில் காவலில் இருந்து வந்துள்ளார். நேற்று (நவம்பர் 18) இரவும் வழக்கம்போல் மாறன் தனது விவசாயத் தோட்டத்தில் இரவு நேர காவலுக்குச் சென்றார். இரவு 10.45 மணியளவில் மாறன் தோட்டத்திற்குள் ஒற்றை யானை வந்தது. யானை வருவதை கவனிக்காமல் அங்கே சென்ற மாறனை யானை திடீரென துரத்த ஆரம்பித்தது. இதனால் அதிர்ச்சி அடைந்த மாறன் தப்பிஓட முயன்றார். ஆனால் அதற்குள் யானை அவரை தாக்கி மிதித்தது. இதில் சம்பவ இடத்திலேயே மாறன் உடல் நசுங்கி பரிதாபமாக இறந்தார். யானை சத்தத்தைக் கேட்டு அருகிலுள்ள தோட்டத்தில் காவலில் இருந்தவர்கள் ஓடிவந்து பார்த்தனர். அப்போது மாறன் இறந்துகிடப்பதைக் கண்டு அதிர்ச்சி அடைந்தனர். இதுகுறித்து வனத்துறையினர் மற்றும் கடம்பூர் போலீசாருக்கு தகவல் தெரிவிக்கப்பட்டது.
