ஈரோடு மாநகர் பகுதியில் கொட்டி தீர்த்த கனமழை
ஈரோடு மாநகர் பகுதியில் வெயிலின் தாக்கம் வழக்கம் போல் அதிகரித்து காணப்பட்டது. ஆனால் மாலை 4 மணி அளவில் திடீரென லேசான காற்று மற்றும் இடியுடன் பலத்த மழை பெய்ய தொடங்கியது. சுமார் 30 நிமிடங்கள் வரை இந்த மழை கொட்டியதீர்த்தது. இதனால் ஈரோடு மாநகர் பகுதியில் மழைநீர் தேங்கி நின்றது. ஈரோடு அகில் மேடு வீதியில் சின்ன மார்க்கெட் பகுதி அம்மா உணவகத்தில் மழைநீர் சூழ்ந்து வெள்ளக்காடாக காட்சியளித்தது. இதனால் இந்த பகுதியைக் கடக்க வாகன ஓட்டிகள் மிகவும் சிரமம் அடைந்தனர். ஈரோடு வ உ சி காய்கறி மார்க்கெட் வளாகத்தில் வழக்கம் போல் மழைநீர் தேங்கி நின்று சேறுமடிக்காடாக காட்சியளித்ததால் காய்கறிகள் வாங்க சென்ற பொதுமக்கள், வியாபாரிகள் கடும் அவதி அடைந்தனர். இங்கே லேசாக மழை பெய்தாலே சேறுமடிக்காடாக காட்சியளிப்பது தொடர்கதையாகி வருகிறது. ஈரோடு மாவட்டத்தில் நேற்று காலை 8 மணி முதல் இன்று காலை 8 மணி வரையிலான நிலவரத்தின்படி, மாவட்டத்தில் 37.40 மி.மீ. மழை பதிவாகி இருந்தது. அதிகபட்சமாக ஈரோட்டில் 14.20 மி.மீ. மழை பதிவாகி இருந்தது. மாவட்டத்தின் பல்வேறு பகுதிகளில் பெய்திருந்த மழையளவு விவரம் (மில்லி மீட்டரில்) வருமாறு: ஈரோடு – 14.20, கொடுமுடி – 6, பெருந்துறை – 5, சென்னிமலை – 2, பவானி – 1.60, குண்டேரிப்பள்ளம் -1.20, பவானிசாகர் அணை – 7.40.
