அரிசி கடத்தல் - வாகன சோதனையில் மூவர் கைது!!
தர்மபுரி மாவட்டத்தில் ரேஷன் அரிசி கடத்தல் தொடர்பாக குடிமைப் பொருள் வழங்கல் குற்றப்புலனாய்வு துறை அதிகாரிகள் தொடர்ந்து வாகன சோதனையில் ஈடுபட்டு வருகின்றனர். முந்தைய நாள் இரவு 9:30 மணியளவில் தர்மபுரி-கிருஷ்ணகிரி தேசிய நெடுஞ்சாலையில் காரிமங்கலம் அருகே கும்பாரஹள்ளியில் வாகன சோதனை மேற்கொள்ளப்பட்டது. இதில் சேலம் சரக டி.எஸ்.பி. விஜயகுமார், கிருஷ்ணகிரி எஸ்.ஐ. பெருமாள், தர்மபுரி குற்றப்புலனாய்வு துறை எஸ்.ஐ. கிருஷ்ணவேணி மற்றும் போலீசார் இணைந்து செயல்பட்ட போது அசோக் லைலேண்ட் சரக்கு வாகனத்தில் 3 டன் ரேஷன் அரிசி கடத்தி வந்தது கண்டுபிடிக்கப்பட்டது. இதையடுத்து கிருஷ்ணகிரி மாவட்டத்தைச் சேர்ந்த மல்லேஷ் (21), ராஜ்குமார் (39), தர்மபுரி மாவட்டத்தைச் சேர்ந்த மாரியப்பன் (53) ஆகியோரை போலீசார் கைது செய்தனர்.
