திருமூர்த்தி அணையில் மர்மமான முறையில் முதியவர் உயிரிழப்பு?

உடுமலை அடுத்த திருமூர்த்தி அணையில் அடையாளம் தெரியாத சுமார் 55 வயது மதிக்கத்தக்க ஆண் சடலம் கரை ஒதுங்கியது. இது குறித்து பொதுமக்கள் தளி போலீசுக்கு தெரிவித்தனர். அதன் பேரில் அங்கு விரைந்த போலீசார் சடலத்தை மீட்டு பிரதே பரிசோதனைக்காக உடுமலை அரசு ஆஸ்பத்திரிக்கு அனுப்பி வைத்தனர். சம்பந்தப்பட்ட நபர் யார்? அவர் எந்த ஊரை சேர்ந்தவர்? தற்கொலை செய்து கொண்டாரா அல்லது கொலை செய்து வீசப்பட்டாரா? அணையை சுற்றி பார்க்க வந்தபோது தவறி விழுந்து விட்டாரா ? என்ற விவரம் தெரியவில்லை.

இதனால் அருகில் உள்ள போலீஸ் நிலையங்களில் மாயமான நபர்கள் குறித்தும் ஏதேனும் புகார் பதிவாகி உள்ளதா என்றும் போலீசார் விசாரித்து வருவதாக தெரிகிறது. மேலும் இது குறித்து வழக்கு பதிவு செய்துள்ள போலீசார் இறந்தவர் மற்றும் அவரது உறவினர்களை அடையாளம் காணும் பணியில் தீவிரம் காட்டி வருகின்றனர்.