கல்குவாரிக்கு எதிர்ப்பு: கிராம மக்கள் திடீர் போராட்டம்

சாத்தான்குளம் அருகே கல்குவாரிக்கு எதிர்ப்பு தெரிவித்து கிராம மக்கள் நேற்று (செப்.,25) திடீரென போராட்டத்தில் ஈடுப்பட்டனர்.

தூத்துக்குடி மாவட்டம், சாத்தான்குளம் அருகே நெடுங்குளத்தில் கலுங்கு விளை சாலையில் தனியார் கல்குவாரி தொடங்கப்பட்டு செயல்பட்டு வருகிறது. இங்கு வெடிவைத்து பாறைகள் உடைக்கப்படுவதால் இப்பகுதியில் உள்ள குடியிருப்புகளில் சுவர்களில் விரிசல் ஏற்படுவதாகவும், பள்ளி செல்லும் மாணவ, மாணவிகள் அச்சத்துடன் செல்லும் நிலை உள்ளதாகவும் கிராம மக்கள் புகார் தெரிவித்து வந்தனர்.

கல்குவாரியை அகற்ற நடவடிக்கை எடுக்க வலியுறுத்தி கடந்த கிராமசபை கூட்டத்தில் தீர்மானம் நிறைவேற்றப்பட்டதுடன் சம்பந்தப்பட்ட அதிகாரிகளுக்கு கிராம மக்கள் சார்பில் மனு அளிக்கப்பட்டது. ஆனால் நடவடிக்கை எடுக்கவில்லையாம்.

இந்நிலையில் நெடுங்குளத்தில் செயல்படும் கல்குவாரியை அகற்ற நடவடிக்கை எடுக்க வலியுறுத்தி அப்பகுதியை சேர்ந்த ஆண்கள், பெண்கள் உள்ளிட்ட சுமார் 200க்கு மேற்பட்டோர் நேற்று (செப்.,25) காலை அங்குள்ள பால்பண்ணை முன்பு திரண்டு வந்து திடீரென அமர்ந்து கண்ணீல் கறுப்பு துணி கட்டி போராட்டத்தில் ஈடுபட்டனர்.