தஞ்சை: மும்மொழி கொள்கையை மத்திய அரசு திரும்ப பெற வேண்டும்; சிபிஐ
மும்மொழி கொள்கையை மத்திய அரசு திரும்பப் பெற வேண்டும் என இந்திய கம்யூனிஸ்ட் கட்சி கோரிக்கை விடுத்துள்ளது. தஞ்சாவூரில் இக்கட்சியின் தெற்கு மாவட்ட நிர்வாகக் குழுக் கூட்டம் செவ்வாய்க்கிழமை நடைபெற்றது. இதில் தமிழ்நாட்டிற்கு தரவேண்டிய கல்வி நிதி குறித்து தமிழ்நாடு எம்பிக்கள் பேசியதற்கு, தமிழ்நாட்டு மக்கள் நாகரிகமற்றவர்கள், பண்பற்றவர்கள், அவர்கள் முன்னேற்றத்துக்கு எம்பிக்கள் முட்டுக்கட்டையாக உள்ளனர் என பேசிய கல்வி அமைச்சர் தர்மேந்திர பிரதான் பதவி விலக வேண்டும். அவர் தமிழ்நாட்டு மக்களிடம் மன்னிப்புக் கேட்க வேண்டும். தமிழ்நாட்டின் மக்கள் விருப்பத்துக்கு மாறாக ஹிந்தியைத் திணிக்கும் மும்மொழி கொள்கையை மத்திய அரசு திரும்பப் பெற வேண்டும். கல்விக்கான நிதியை எவ்வித நிர்ப்பந்தமும் இன்றி உடனடியாக வழங்க வேண்டும் என்பன உள்ளிட்ட தீர்மானங்கள் நிறைவேற்றப்பட்டன. மாவட்ட நிர்வாகக் குழு உறுப்பினர் ஆர். ராமச்சந்திரன் தலைமை வகித்தார். தெற்கு மாவட்டச் செயலர் முத்து. உத்திராபதி, பொருளாளர் கோ. பாஸ்கர், மாவட்டத் துணைச் செயலர் கோ. சக்திவேல், மாவட்ட நிர்வாகக் குழு உறுப்பினர்கள் சோ. பாஸ்கர், தி. திருநாவுக்கரசு, அ. கலியபெருமாள், த. கண்ணகி, ஆர். ஆர். முகில் உள்ளிட்டோர் கலந்து கொண்டனர்.
