மானாமதுரை பகுதிகளில் தர்பூசணி விவசாயம் பாதிப்பு

சிவகங்கை மாவட்டம் திருப்புவனம் அருகே உள்ள கிளாதரி, மீனாட்சிபுரம், லட்சுமிபுரம், திருமாஞ்சோலை, அரசனூர் உள்ளிட்ட பகுதிகளில் சுமார் 1000 ஏக்கரில் தர்ப்பூசணி பயிரிடப்பட்டுள்ள நிலையில், கேரள வியாபாரிகள் பழங்களை கொள்முதல் செய்ய வராததால், விவசாயிகள் பழங்களை பறிக்காமல் செடியிலேயே விட்டு வாடவிட்டு வருகின்றனர். இந்த பகுதியில் தர்ப்பூசணி விளைச்சல் கடந்த 10 ஆண்டுகளாக அதிகரித்து வந்த நிலையில், செம்மண் நிலத்தில் பயிரிடப்பட்டதால் அதன் ருசி கூடுதலாக இருக்கிறது. 

ஏக்கருக்கு சுமார் 25,000 ரூபாய் வரை செலவாகும் தர்ப்பூசணி பயிரிடும் விவசாயம், இந்த ஆண்டு பெரிதும் மோசடியில் முடிந்துள்ளது. வழக்கமாக விதை வாங்கும் போதே கேரள வியாபாரிகள் அட்வான்ஸ் கொடுத்து கொள்முதல் செய்து வந்தனர். ஆனால், இந்த ஆண்டு உணவு பாதுகாப்பு அலுவலர் ஒருவர், "தர்ப்பூசணி பழங்களில் நிறம் பெற மருந்து ஊசி செலுத்தப்படுகிறது" என தெரிவித்ததை அடுத்து, அந்த தகவல் சமூக ஊடகங்களில் பரவியது. இதன் தாக்கமாக கேரள வியாபாரிகள் பழங்களை வாங்க வர மறுத்துள்ளனர். தர்ப்பூசணி பழங்கள் 60 நாட்களில் அறுவடை செய்யும் நிலையில், ஏக்கருக்கு சுமார் 30 டன் வரை விளைச்சல் கிடைக்கிறது. ஆனால், தற்போது வாங்க ஆளில்லாததால், பழங்கள் பழுத்து செடியிலேயே அழுகி வருகின்றன. விற்பனை நடைபெறாததால் விவசாயிகள் தர்ப்பூசணி செடிகளுக்கு நீர் பாய்ச்சுவதை நிறுத்தியுள்ளதாகவும் தெரிவிக்கின்றனர்.