சேலம்: மாடிக்கு சென்ற தொழிலாளி மின்சாரம் தாக்கி பலி

சேலம் கோட்டை அண்ணாநகரில் உள்ள குடிசை மாற்று வாரிய குடியிருப்பில் 3-வது மாடியில் வசித்து வந்தவர் ஆனந்தராஜ் (வயது 26). இவர் வெல்டிங் பட்டறையில் தொழிலாளியாக வேலை பார்த்து வந்தார். இவருடைய மனைவி சந்தியா. இவர்களுக்கு ஒரு பெண் குழந்தை உள்ளது.

ஆனந்தராஜ் நேற்று முன்தினம் (அக்.3)இரவு சுமார் 15 அடி நீளமுள்ள அலுமினிய கம்பியை மொட்டை மாடியில் வைப்பதற்காக எடுத்து சென்றார். படிக்கட்டில் ஏறிய போது அந்த கம்பி அருகில் இருந்த மின்சார ஒயர் மீது எதிர்பாராதவிதமாக உரசியது.

இதில் ஆனந்தராஜ் மீது மின்சாரம் தாக்கியதில் அவர் தூக்கி வீசப்பட்டார். உடல் கருகி படுகாயம் அடைந்த அவரை அங்கிருந்தவர்கள் மீட்டு சிகிச்சைக்காக சேலம் அரசு ஆஸ்பத்திரிக்கு கொண்டு சென்றனர். அங்கு அவரை டாக்டர்கள் பரிசோதனை செய்தனர். இதில் ஆனந்தராஜ் வரும் வழியிலேயே இறந்து விட்டதாக டாக்டர்கள் தெரிவித்தனர். பின்னர் ஆனந்தராஜ் உடலை டவுன் போலீசார் மீட்டு பிரேத பரிசோதனை கூடத்துக்கு அனுப்பி வைத்தனர். மேலும் சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.