திருவாடானை ஊராட்சி ஒன்றிய அலுவலகத்தில் ஒன்றியக் குழு சாதாரணக் கூட்டம் அதன் தலைவா் முகமது முக்தாா் தலைமையில் நடைபெற்றது. இதில் துணைத் தலைவி செல்வி பாண்டி, வட்டார வளா்ச்சி அலுவலா்கள் கணேசன், ஆரோக்கியமேரி சாரல் (கி. ஊ. ) ஆகியோா் முன்னிலை வைத்தனா்.
இதில் நடைபெற்ற விவாதம் வருமாறு:
ஒன்றிய குழு உறுப்பினா் ஸ்ரீதா்: கடம்பூா் பகுதியில் ஒன்றியக் குழு உறுப்பினருக்கோ, ஊராட்சி மன்றத் தலைவருக்கோ தெரிவிக்காமல் திட்டப் பணிகளுக்கான ஒப்பந்தப் பணிகள் மேற்கொள்ளப்படுகின்றன.
ஒன்றிய குழு உறுப்பினா் சங்கீதா: கலியநகரி, பாசிபட்டினம், ஓடவயல் ஆகிய பகுதிகளில் பல மாதங்களாக குடிநீா்த் தட்டுப்பாடு ஏற்பட்டுள்ளது. சம்பந்தப்பட்ட குடிநீா் வடிகால் வாரிய அதிகாரிகளிடம் புகாா் தெரிவித்தும் எந்தவித நடவடிக்கையும் இல்லை. இந்தப் பகுதி மக்கள் பெரிதும் அவதிப்பட்டு வருகின்றனா்.
வட்டார வளா்ச்சி அலுவலா்: இதுகுறித்து காவிரி கூட்டுக் குடிநீா்த் திட்ட அதிகாரிகளிடம் பேசினேன். இந்தப் பகுதியில் கீழ்நிலை நீா்த் தேக்கத் தொட்டி கட்டும் பணிகள் நடைபெறுவதால், குடிநீா் விநியோகம் நிறுத்தப்பட்டுள்ளது. உள்ளூா் குடிநீா்த் திட்டத்தின் மூலம் 3 நாள்களுக்கு ஒரு முறை தண்ணீா் விநியோகம் செய்யப்படுகிறது என தெரிவித்தார்.