மதுரை: தலைவர் அறிவுரைக்கு எதிராக கட்சிகளை சீண்டும் தவெகவினர்

தமிழ் சினிமாவின் முன்னணி நடிகராக நடித்து வரும் விஜய் தமிழக வெற்றி கழகம் என கட்சியை தொடங்கி அதற்கான அங்கீகாரத்தை பெற்று கொடியையும் வெளியிட்டுள்ள நிலையில் நாளை மறுநாள் விக்ரவாண்டி பகுதியில் உள்ள வி சாலையில் முதல் அரசியல் கட்சி மாநாட்டை நடத்தவுள்ளார்.

இந்நிலையில் தமிழக வெற்றி கழக நிர்வாகிகள் சார்பில் பல்வேறு போஸ்டர்கள் ஒட்டப்பட்டு பொதுமக்களை மாநாட்டிற்கு அழைப்பு விடுத்து வருகின்றனர்.

ஏற்கனவே தமிழக வெற்றி கழகத்தின் தலைவரான நடிகர் விஜய் விடுத்துள்ள அறிக்கை ஒன்றில் நமது கொள்கைகளை மக்களிடம் எடுத்துரைப்போம், மற்ற கட்சிகளின் செயல்பாடுகள் குறித்து பேச தேவையில்லை என கூறிய நிலையில் ஆளும் கட்சியான திமுகவை விமர்சிக்கும் வகையில் விடியா அரசை வீழ்த்திட விக்கிரவாண்டி வாருங்கள் எனவும் மன்னர் ஆட்சிக்கு முடிவு தளபதியால் மக்களாட்சிக்கு விடிவு என்ற ஆளுங்கட்சிக்கு எதிரான வாசகங்களோடு மதுரை முழுவதிலும் போஸ்டர்கள் ஒட்டப்பட்டுள்ளது பரபரப்பை ஏற்படுத்தியுள்ளது.

இப்போதும் எங்கள் முதலமைச்சர் நடிகர் விஜய் தான் என்பதை சொல்லும் வகையில் ஆங்கிலத்தில் யூ ஆர் த ஒன்லி வாக்கிங் சீப் மினிஸ்டர் என்ற வாசகங்களோடு தமிழக முதலமைச்சரை சாடும் வகையிலும் நிர்வாகிகள் ஒட்டிய போஸ்டர் சர்ச்சையை ஏற்படுத்தியுள்ளது.

தலைவரின் அறிக்கைக்கு எதிராக நிர்வாகிகள் நடந்து கொள்கிறார்களா என்ற கேள்வி பொதுமக்கள் மத்தியில் எழுந்துள்ளது.