தண்டலம் கூட்டுச்சாலையில் தொடரும் விபத்து அபாயம்

காஞ்சிபுரம் மாவட்டம் ஸ்ரீபெரும்புதுார் அருகே தண்டலம், அரக்கோணம் நெடுஞ்சாலை, சென்னை- - பெங்களூரு தேசிய நெடுஞ்சாலையுடன் இணையும் தண்டலம் கூட்டுச்சாலை சந்திப்பு உள்ளது. இந்த வழியே ஏராளமான வாகனங்கள் செல்கின்றன.
இந்த நிலையில், தண்டலம், இருங்காட்டுக்கோட்டை, மேவளூர்குப்பம், கீவளூர், நெமிலி, மண்ணுார், செங்காடு பகுதிகளில், தொழிற்சாலைகள் எண்ணிக்கை அதிகரித்து வருவதால், அதற்கேற்ப சாலையில் வாகனங்களின் எண்ணிக்கையும் கணிசமாக அதிகரித்து வருகிறது. ஆனால், இச்சாலை சந்திப்பில் போக்குவரத்தை ஒழுங்குப்படுத்த போலீசார் இருப்பதில்லை.

வாகன ஓட்டிகள் தங்கள் இஷ்டம் போல், தாறுமாறாக சாலையில் புகுந்து செல்கின்றனர். இதனால், அடிக்கடி விபத்து ஏற்படுகிறது. இதனால், இந்த பகுதியை கடந்து செல்ல வாகன ஓட்டிகள் அச்சம் அடைகின்றனர்.

எனவே, சிக்னல் மற்றும் போதிய போக்குவரத்து போலீசாரை பணியமர்த்தி போக்குவரத்தை ஒழுங்குப்படுத்த சம்பந்தப்பட்ட அதிகாரிகள் நடவடிக்கை எடுக்க வேண்டும் என, சமூக ஆர்வலர்கள் எதிர்பார்க்கின்றனர்.