தனியார் நாளிதழ் போட்டோகிராபரை வெட்டி தங்க செயின் பறிப்பு

தாம்பரம் மாநகராட்சி குரோம்பேட்டை பகுதியைச் சேர்ந்தவர் கவுதம் (30), இவர் தனியார் நாளிதழின் தாம்பரம் பகுதி போட்டோகிராபராக உள்ளார். நேற்று அதிகாலை 3 மணியளவில் தனது டூவீலரில் குன்றத்தூர் அடுத்த கோவூர் பகுதியை கடந்து சாலையில் சென்று கொண்டிருந்தார்.

அப்போது பைக்கில் வந்து வழிமறித்த இரண்டு மர்மநபர்கள், கவுதமை கத்தியால் வெட்டி அவர் அணிந்திருந்த 5 சவரன் தங்க செயின் மற்றும் அவர் வைத்திருந்த பையை பறித்து சென்றனர்.

அந்த பையில் ரூ. 1. 5 லட்சம் இருந்ததாக கூறப்படுகிறது. இந்நிலையில் வெட்டுக்காயம் அடைந்த கவுதம் சிகிச்சைக்காக குரோம்பேட்டை அரசு மருத்துவமனையில் சிகிச்சைக்காக அனுமதிக்கப்பட்டார்.

இதுகுறித்த புகாரின் பேரில் மாங்காடு போலீசார் வழக்கு பதிந்து விசாரித்து வருகின்றனர். இது பத்திரிகையாளர்களிடம் அதிர்ச்சியை ஏற்படுத்தியுள்ளது.