ஈரோடு பள்ளி மாணவர்களுக்கான 2-ம் பருவ பாட புத்தகம் வருகை

ஈரோடு மாவட்டத்தில் 1-8ம் வகுப்பு படிக்கும் மாணவ-மாணவிகளுக்கு வழங்க இரண்டாம் பருவ பாட புத்தகம் வந்தடைந்தது.

தமிழ்நாட்டில் உள்ள அனைத்து அரசு மற்றும் அரசு உதவி பெறும் பள்ளிகள், தனியார் பள்ளிகளில் காலாண்டு தேர்வு நேற்று(செப்.19) முதல் துவங்கியது. இந்தத் தேர்வு வருகிற 27ம் தேதி நிறைவடைந்து, பள்ளிகளுக்கு விடுமுறை விடப்பட்டு, மீண்டும் அனைத்து பள்ளிகளும் அக்டோபர் மாதம் 3-ம் தேதி திறக்கப்பட உள்ளது. இதையடுத்து, 1ம் வகுப்பு முதல் 8ம் வகுப்புவரை படிக்கும் மாணவ-மாணவிகளுக்கு இரண்டாம் பருவ பாட புத்தகம் வழங்க தமிழ்நாடு பாடநூல் கழகத்தில் இருந்து ஒவ்வொரு மாவட்டமாக அனுப்பி வைக்கப்பட்டு வருகிறது.

இதன்படி, ஈரோடு மாவட்டத்தில் தொடக்க மற்றும் நடுநிலைப் பள்ளிகள், உயர்நிலை மற்றும் மேல்நிலை பள்ளிகளில் 1ம் வகுப்பு முதல் 8ம் வகுப்புவரை படிக்கும் மாணவ- மாணவிகளுக்கு வழங்க இரண்டாம் பருவ பாட புத்தகம், நோட்டுகள் வந்தது. இதனைஈரோடு காந்திஜி சாலையில் உள்ள அரசு மகளிர் மாதிரி மேல்நிலைப்பள்ளியில் உள்ள இருப்பு அறையில் வகுப்பு மற்றும் பாட வாரியாக வைக்கப்பட்டு உள்ளது.