கோவை: மதுபோதையில் தகராறில் ஈடுபட்ட போதை ஆசாமி!

கோவை, காந்திபார்க் இடையர் வீதி பகுதியில் மது போதையில் இருந்த ஒருவர் சாலையில் செல்லும் மக்கள் இடையே நேற்று தகாத வார்த்தைகளால் பேசி ரகளையில் ஈடுபட்டார். அப்போது அவ்வழியாக ரோந்து பணியில் ஈடுபட்ட போலீசார், மது போதையில் இருந்தவரை அங்கிருந்து செல்ல அறிவுறுத்தினர். ஆனால், போதை ஆசாமி போலீசாரை ஒருமையில் பேசியது மட்டுமல்லாமல், உன்னால என்ன செய்ய முடியும், போடா வாடா எனத் தகாத வார்த்தைகளால் பேசினார். இதனால் ஆத்திரமடைந்த போலீசார், போதை ஆசாமியின் முகத்தில் தண்ணீரை ஊற்றி, லத்தியால் அடித்து துவைத்தனர். பின்னர், போலீசார் அவரை வாகனத்தில் ஏற்றி வெரைட்டிஹால் காவல் நிலையத்திற்கு அழைத்துச் சென்றனர். போதை ஆசாமி போலீசாருடன் தகராறு செய்யும் காட்சியும், அவரை அடித்து துவைக்கும் காட்சியும் சமூக வலைதளங்களில் வைரலாகி வருகிறது.