கோவை: தைப்பூச சிறப்பு ரயில்; பயணிகள் இன்றி இயக்கம்

கோவை - திண்டுக்கல் இடையே தைப்பூசத் திருவிழாவை முன்னிட்டு, பயணிகளின் வசதிக்காக கோயம்புத்தூர் மற்றும் திண்டுக்கல் இடையே முன்பதிவில்லா சிறப்பு ரயில் சேவையை சேலம் கோட்ட ரயில்வே நேற்று முதல் தொடங்கியுள்ளது. கோயம்புத்தூரில் இருந்து காலை 9:35 மணிக்கு புறப்பட்ட ரயில், மதியம் 1:10 மணிக்கு திண்டுக்கல் சென்றடைந்தது. மறுபுறம், திண்டுக்கல்லில் இருந்து மதியம் 2:00 மணிக்கு புறப்படும் ரயில், மாலை 5:50 மணிக்கு கோயம்புத்தூர் வந்தடைந்தது. இந்த ரயில் போத்தனூர், கிணத்துக்கடவு, பொள்ளாச்சி, உடுமலைப்பேட்டை, பழனி மற்றும் ஒட்டன்சத்திரம் ஆகிய ரயில் நிலையங்களில் நின்று செல்லும். இருப்பினும், இந்த சிறப்பு ரயில் சேவை குறித்து பொதுமக்களுக்கு போதிய விழிப்புணர்வு இல்லாததால், நேற்று காலை ரயில் பயணிகள் இன்றி காலியாக இயக்கப்பட்டது. இந்த ரயில் சேவை பிப்ரவரி 14 வரை (ஞாயிற்றுக்கிழமை தவிர) இயக்கப்படும் என்பதும் குறிப்பிடத்தக்கது.