இளம்பெண்ணுக்கு மிரட்டல்: ஐ.டி ஊழியர் கைது
ராமநாதபுரத்தைச் சேர்ந்தவர் 26 வயது இளைஞர் பொறியியல் பட்டதாரி. இவர்சென்னையில் உள்ள ஒரு தனியார் ஐடி நிறுவனத்தில் பணிபுரிந்து வந்துள்ளார். பின்னர், அவர் டீம் லீடராக புரோமோட் ஆகியுள்ளார். அதன் பின்னர் அவரது மேற்பார்வையில் எட்டு பேர் பணியில் இருந்துள்ளனர். அதில் 24 வயது இளம்பெண்ணும் இருந்துள்ளார். முதலில் அவருடன் நட்பாக பழகி வந்த இளைஞர், ஒரு வருடத்திற்கு மேலாக ஒருதலையாக காதலித்து வந்துள்ளார். தொடர்ந்து, அப்பெண்ணிடம் தனது காதலைக் கூறியுள்ளார். ஆனால், அப்பெண் அதனை ஏற்கவில்லை. பின்னர், பலமுறை முயற்சி செய்தும் அதற்கு பலனில்லை. இந்த நிலையில், அப்பெண்ணின் நிர்வாண புகைப்படத்தை அந்த பெண்ணுக்கு அனுப்பி உள்ளார். இதைப் பார்த்து அப்பெண் அதிர்ச்சி அடைந்துள்ளார். ஆபாச புகைப்படங்கள், ஆபாச வீடியோக்களை சமூக வலைத்தளத்தில் பதிவிடுவேன். ஆனால், நான் சொல்வதை எல்லாம் செய்தால் புகைப்படங்களை டெலிட் செய்து விடுவேன் எனக் கூறி மிரட்டி உள்ளார். இதனிடையே, அப்பெண் பீர்க்கன்கரணை காவல் நிலையத்தில் புகார் அளித்தார். இந்தப் புகாரின் அடிப்படையில் ராமநாதபுரம் விரைந்த போலீசார், அந்த இளைஞரைக் கைது செய்து காவல் நிலையம் அழைத்து வந்து விசாரணை நடத்தினர். அதன் பின்னர், அந்த இளைஞர் மீது வழக்குப்பதிவு செய்த காவல்துறையினர், அவரை நீதிபதி முன் ஆஜர்படுத்தி சிறையில் அடைத்தனர்.
