சாத்துார்: மோட்டார் சைக்கிளில் சென்றவர் மயங்கி விழுந்து பலி

விருதுநகர் மாவட்டம், சாத்தூர் அருகே உள்ள அப்பையநாயக்கன்பட்டியை சேர்ந்தவர் ராமலிங்கம் (வயது 44), இவர் வெளிநாட்டில் வேலை செய்து வந்தார். இவர் தனது நண்பர் ராஜகோபாலின் மோட்டார் சைக்கிளில் பின்னால் அமர்ந்து சாத்தூர் சென்று கொண்டிருந்தார். 

அப்போது கோட்டூர் - இருக்கன்குடி சாலையிலுள்ள குண்டலகுத்தூர் பஸ் ஸ்டாப் அருகே சென்று கொண்டிருந்த போது ராமலிங்கம் திடீரென மயங்கி மோட்டார் சைக்கிளில் இருந்து கீழே விழுந்ததாக கூறப்படுகிறது. உடனே 108 மூலம் ஆம்புலன்சுக்கு தகவல் தெரிவித்தனர். 108 ஆம்புலன்ஸ் செவிலியர், ராமலிங்கத்தை பரிசோதித்த போது அவர் ஏற்கனவே இறந்து விட்டதாக கூறினார். 

இதுகுறித்து தகவல் அறிந்த அப்பையநாயக்கன்பட்டி போலீசார் சம்பவ இடத்திற்கு விரைந்து வந்து ராமலிங்கத்தின் உடலை மீட்டு பிரேத பரிசோதனைக்காக சாத்தூர் அரசு மருத்துவமனைக்கு அனுப்பி வைத்தனர். இந்த சம்பவம் குறித்து ராமலிங்கத்தின் மனைவி தமிழ்ச்செல்வி கொடுத்த புகாரின் பெயரில் அப்பையநாயக்கன்பட்டி போலீசார் வழக்குப் பதிவு செய்து விசாரணை நடத்தி வருகின்றனர்.