மாணவர்களுக்கான "விபத்தில்லா தீபாவளி" செயலரங்கம்

கல்வி மையத்தில் விபத்தில்லா தீபாவளி: செயலாக்க நிகழ்ச்சி

திருவண்ணாமலை மாவட்டம், வந்தவாசி ஸ்ரீகிருஷ்ணா கல்வி மையத்தில் மாணவர்களுக்கான "விபத்தில்லா தீபாவளி" செயலரங்கம் நடைபெற்றது. இந்த நிகழ்வுக்கு கல்வி மைய முதல்வர் பா. சீனிவாசன் தலைமை வகித்தார். தாழம்பள்ளம் ஊராட்சி ஒன்றிய தொடக்கப் பள்ளி தலைமை ஆசிரியர் க. வாசு, பட்டதாரி ஆசிரியர் ரகுபதி ஆகியோர் முன்னிலை வகித்தனர்.
சிறப்பு அழைப்பாளராக, வந்தவாசி தீயணைப்புத்துறை சிறப்பு அலுவலர் மு. பிரபாகரன் பங்கேற்று, தீபாவளி அன்று பட்டாசுகளை எப்படி வெடிக்க வேண்டும் என்பது பற்றியும், பட்டாசுக்களை குழந்தைகள் தனியாக வெடிக்காமல் பெற்றோர் துணையுடன் பாதுகாப்பாக வெடிக்கவும் அறிவுறுத்தினார். மேலும் திறந்த வெளிப் பகுதிகளில் மட்டுமே பட்டாசு வெடித்து கையாள வேண்டும் என்று சொல்லி, பட்டாசு மாதிரிகளை கையில் பிடித்து அதன் செயல்பாடுகளை மாணவர்களிடம் விளக்கினார். மேலும் விபத்தில்லா தீபாவளி கொண்டாட வழிமுறைகள் அடங்கிய துண்டுப் பிரசுரங்கள் வழங்கப்பட்டது. தீயணைப்பு துறை வீரர் ஏழுமலை, நூலகர் ஜா. தமீம், ரெட் கிராஸ் சங்க உறுப்பினர் அ. ஷாகுல் அமீது ஆகியோர் கருத்துரைகளை வழங்கினர். இறுதியில் முதுகலை ஆசிரியர் க. பூபாலன் நன்றி கூறினார்.