முசிறி-கோவில் மணி அமைப்பது தொடர்பாக இரு தரப்பினரிடையே மோதல்

திருச்சி மாவட்டம், முசிறி அருகே பிள்ளாபாளையம் கிராமத்தில் மதுரைவீரன் சுவாமி கோவில் அமைந்துள்ளது. இந்த கோவில் முன்பாக ஒரு சமுதாயத்தை சேர்ந்தவர்கள் இரும்பு தூண்கள் அமைத்து அதில் மணி கட்டி தொங்க விட்டுள்ளனர். இதற்கு அதே பகுதியை சேர்ந்த மற்றொரு சமுதாயத்தினர்மணி பாதையில் இருப்பதாக எதிர்ப்பு தெரிவித்து கோவில் முன்பாக தொங்க விடப்பட்ட மணி மற்றும் இரும்புக் தூண்களை அகற்ற வேண்டும் என வலியுறுத்தினர்.
இதுகுறித்து முசிறி கோட்டாட்சியர் ஆரமுத தேவசேனா தலைமையில் அமைதி பேச்சுவார்த்தை கூட்டம் நடந்தது. அப்போது கூட்டத்தில் எடுக்கப்பட்ட முடிவிற்கு மணி அமைத்த தரப்பினர் மறுப்பு தெரிவித்த நிலையில் உடன்படிக்கையில் கையெழுத்திடாமல் சென்றுள்ளனர். இரும்புத்தூண் மற்றும் மணி ஆகியவற்றை அகற்றுவதற்கு மணி அமைத்தவர்கள் கருப்பு கொடிகட்டி எதிர்ப்பு தெரிவித்து வந்தனர். இந்தநிலையில் நேற்று அப்பகுதியில் அசம்பாவித சம்பவங்கள் நடைபெறாமல் தடுப்பதற்காக முசிறி போலீஸ் டி. எஸ். பி சுரேஷ்குமார் தலைமையில், போலீஸ் பாதுகாப்புடன் முசிறி தாசில்தார் லோகநாதன் மேற்பார்வையில் வருவாய் துறையினர் கோவில் முன்பு அமைக்கப்பட்ட இரும்புத்தூண் மற்றும் மணி ஆகியவற்றை அகற்றினர். இதற்குமணி அமைத்தவர்கள் கடும் எதிர்ப்பு தெரிவித்து வருவாய்த்துறை மற்றும் போலீசாரிடம் கடும் வாக்குவாதத்தில் ஈடுபட்டதால் அப்பகுதியில் பரபரப்பு ஏற்பட்டது.