மாநாடு வெற்றி பெற நன்னிலம் கோவிலில் வழிபாடு செய்த த. வெ. க

தமிழக வெற்றி கழகத்தின் தலைவரும் நடிகருமான விஜய் தலைமையில் வருகின்ற 27ஆம் தேதி விக்கிரவாண்டியில் அந்தக் கட்சிக்கான முதல் மாநாடு நடைபெற உள்ளது. இந்த மாநாட்டிற்கான ஏற்பாடுகள் தீவிரமாக நடைபெற்று வரும் நிலையில் தமிழகம் முழுவதும் உள்ள தமிழக வெற்றிக் கழக கட்சித் தொண்டர்கள் மாநாட்டில் பெரு வாரியாக பங்கேற்பது குறித்த ஆலோசனை கூட்டத்தை தொடர்ந்து அந்தந்த மாவட்டங்களில் நடத்தி வருகின்றனர்.

அந்த வகையில் திருவாரூர் மாவட்டம் நன்னிலம் வட்டத்திற்குட்பட்ட கொல்லுமாங்குடியில் உள்ள தனியார் திருமண மண்டபத்தில் தமிழக வெற்றிக் கழகத்தின் திருவாரூர் வடக்கு மாவட்ட இளைஞரணி சார்பில் ஆலோசனைக் கூட்டம் இன்று நடைபெற்றது. கூட்டத்திற்கு முன்னதாக தமிழக வெற்றி கழகத்தின் முதல் மாநாடு வெற்றி பெற வேண்டும் என அருகில் உள்ள பிரசித்தி பெற்ற அங்காளம்மன் கோவிலில் கட்சி நிர்வாகிகள் நடிகர் விஜய்யின் புகைப்படத்துடன் அர்ச்சனை செய்து வழிபட்டனர். அதனைத் தொடர்ந்து ஆலோசனைக் கூட்டம் நடைபெற்றது. ஆலோசனைக் கூட்டத்தில் மாவட்டத் தலைவர் மதன் மாவட்ட இளைஞரணி துணைத் தலைவர் ஆதி மாவட்ட இளைஞரணி செயலாளர் கார்த்திக் மாவட்ட இளைஞரணி தலைவர் ஸ்டாலின் உள்ளிட்ட 200க்கும் மேற்பட்ட தமிழக வெற்றிக்கழக நிர்வாகிகள் மற்றும் தொண்டர்கள் கலந்து கொண்டனர்.