சேலம்-கொச்சின்: தினசரி விமான சேவை 30-ந் தேதி முதல் இயக்கம்

சேலம் மாவட்டம் ஓமலூர் அருகே காமலாபுரத்தில் சேலம் விமான நிலையம் செயல்பட்டு வருகிறது. இந்த விமான நிலையத்திற்கு சென்னை-சேலம்- சென்னை என இருமார்க்கத்திலும் விமானங்கள் இயக்கப்பட்டு வருகிறது. இதேபோல் அலைன் ஏர் விமான நிறுவனம் மூலம் வாரத்தில் 5 நாட்கள் கொச்சின்-சேலம்-பெங்களூரு சென்று மீண்டும் அதே மார்க்கத்தில் கொச்சினுக்கு பயணிகள் விமான சேவை நடைபெற்று வருகிறது. இந்த நிலையில் வருகிற 30-ந்தேதி முதல் வாரத்தில் 7 நாட்களும் கொச்சின்-சேலம்-பெங்களூரு, அதேபோல் பெங்களூரு-சேலம்- கொச்சின் ஆகிய இரு மார்க்கத்திலும் விமான சேவை இயக்கப்பட உள்ளது. 30-ந் தேதி முதல் மதியம் 12. 10 மணிக்கு கொச்சினில் புறப்படும் விமானம் 1. 20 மணிக்கு சேலம் வந்தடையும். இங்கிருந்து 1. 45-க்கு புறப்பட்டு 2. 45-க்கு பெங்களூருவை அடையும். அதேபோல் பெங்களூருவில் மாலை 3. 20-க்கு புறப்பட்டு 4. 20-க்கு சேலம் வரும். இங்கிருந்து மாலை 4. 40-க்கு புறப்பட்டு 5. 50-க்கு கொச்சினை அடையும் என விமான நிறுவனம் சார்பில் தெரிவிக்கப்பட்டுள்ளது.