ஆர். எஸ். மங்கலத்தில் இ சேவை ஆப்ரேட்டர்களுக்கான பயிற்சி முகாம்

ராமநாதபுரம் மாவட்டம் ஆர். எஸ். மங்கலம் தாலுகா அலுவலகத்தில் இ-சேவை மைய பொறுப்பாளர்களுக்கு சான்றிதழ்கள் விண்ணப்பிக்கும் போது கடைப்பிடிக்க வேண்டிய நடைமுறைகள் குறித்து அதிகாரிகள் பயிற்சி அளித்தனர்.

ஆர். எஸ். மங்கலம் தாலுகாவிற்குட்பட்ட ஆனந்தூர், சனவேலி, திருப்பாலைக்குடி, ஆர். எஸ். மங்கலம் உள்ளிட்ட பகுதிகளை சேர்ந்த இ-சேவை மைய பொறுப்பாளர்களுக்கான பயிற்சி மற்றும் ஆலோசனை கூட்டம் தாலுகா அலுவலகத்தில் தாசில்தார் வரதராஜன் தலைமையில் நடைபெற்றது. மண்டல துணை தாசில்தார் உதயகுமார் முன்னிலை வகித்தார்.
கூட்டத்தில் இ-சேவை மைய பொறுப்பாளர்கள் இணையதள சான்றிதழ்கள் மற்றும் பட்டா மாறுதல் விண்ணப்பங்கள் பதிவேற்றம் செய்யும் போது கடைப்பிடிக்க வேண்டிய நடைமுறைகள் குறித்தும் விண்ணப்பிக்கும் முறை மற்றும் விண்ணப்பிக்க வேண்டிய ஆவணங்கள் குறித்தும் தாசில்தார் வரதராஜன் விளக்கினார்.

மேலும் சான்றிதழ்களுக்கு விண்ணப்பம் செய்யும் போது மைய பொறுப்பாளர்கள் மிகுந்த கவனத்துடன் ஆவணங்களை பதிவேற்ற செய்வதுடன் விண்ணப்பதாரர்களிடம் முறையான கையொப்பம் பெற்று சான்றிதழ்கள் பதிவேற்றம் செய்ய வேண்டும் என அறிவுறுத்தப்பட்டது. பயிற்சி கூட்டத்தில் வருவாய் ஆய்வாளர்கள் ஆனந்தூர் சாத்தையா, ஆதிலட்சுமி, ஆரோக்கியராஜா உட்பட பலர் கலந்து கொண்டனர்.