கோவை: வானதி சீனிவாசன் தீபாவளி வாழ்த்து
இந்தியாவில் மட்டுமல்லாது உலகெங்கும் வாழும் 100 கோடிக்கும் அதிகமான இந்துக்கள் கொண்டாடும் பண்டிகை தீபாவளி. இந்த நாளில் அனைவருக்கும் இனிய தீபாவளி நல்வாழ்த்துக்கள் தெரிவித்துக்கொள்கிறேன். புத்தாடைகள், பட்டாசுகள், இனிப்புகள் என தீபாவளி என்றாலே அனைவருக்கும் உற்சாகம் தான். அதுவும் குழந்தைகளுக்கு தீபாவளி தரும் உற்சாகத்தை யாராலும் தர முடியாது. எவ்வளவுதான் அதர்மம் தலை தூக்கினாலும் இறுதியில் தர்மமே வெல்லும். தீய சக்திகள் வெற்றி பெற்றது போல தோன்றினாலும் இறுதியில் நல்ல சக்திகள் வெல்லும் என்ற உயர்ந்த தத்துவம் தான் தீபாவளி. தீய சக்திகளின் அழிவையும் நல்லவர்களின் வெற்றியையும் புத்தாடைகள், இனிப்புகள், பட்டாசுகளுடன் கொண்டாடி தீர்க்கிறோம். மத்தியில் தொடர்ந்து மூன்றாவது முறையாக பிரதமர் நரேந்திர மோடி தலைமையில் தேசிய ஜனநாயக கூட்டணி அமைந்த பிறகு வரும் முதல் தீபாவளி இது. இந்தியாவின் பொருளாதாரம் என்பது தீபாவளி வணிகத்தைச் சார்ந்தது. தீபாவளிக்காக நாம் வாங்கும் ஒவ்வொரு பொருட்களும் பலருக்கும் வாழ்வளிக்கக் கூடியது. உற்றார் உறவினர்களுக்கு இனிப்புகள் வழங்கி, ஆதரவற்றவர்களுக்கு புத்தாடைகள் கொடுத்து தீபாவளியை கொண்டாடுவோம். இந்த தீபாவளி நாளில் அனைவரது வாழ்விலும் வளம் கொழிக்க நல்வாழ்த்துக்கள் தெரிவித்துக் கொள்கிறேன், என கோவை தெற்கு சட்டமன்ற உறுப்பினர் வானதி சீனிவாசன் எம்எல்ஏ இன்று (அக்.30) அறிக்கை வெளியிட்டுள்ளார்.
