துறையூர்: குப்பைகளால் நோய் பரவும் அபாயம்

துறையூர் புறவழிச்சாலையில் சாலையோரமாக கொட்டப்பட்டுள்ள குப்பைகளை அகற்ற அப்பகுதி பொதுமக்கள் கோரிக்கை விடுத்துள்ளனர்.

நாமக்கல், முசிறி ஆகிய பகுதிகளிலிருந்து சென்னை செல்லும் பேருந்துகள் துறையூர் புறவழிச்சாலை வழியாக சென்று வருகின்றன. இந்நிலையில் துறையூர் புறவழிச்சாலையின் ஓரமாக துறையூர் பகுதியைச் சேர்ந்த ஓட்டல் மற்றும் இறைச்சி கடைக்காரர்கள் கழிவுகளை கொட்டுவதால் தற்போது துர்நாற்றம் வீசுவதாக அப்பகுதி மக்கள் தெரிவித்தனர்.

மேலும், கழிவுகளை உண்ண நாய்கள் மற்றும் பன்றிகள் வருவதால் பொதுமக்களுக்கு இடையூறாக உள்ளது. துர்நாற்றம் வீசுவதால் தொற்று நோய் ஏற்படுவதற்கு முன்பாக குப்பைகளை அகற்ற வேண்டும். மேலும், குப்பைகளை கொட்டாமல் இருக்க நடவடிக்கை எடுக்க வேண்டும் என இப்பகுதி பொதுமக்கள் கோரிக்கை விடுத்துள்ளனர்.