பள்ளிகள் திறப்பையொட்டி கடைகளில் கூட்டம் போக்குவரத்து நெரிசல்

தமிழகத்தில் கோடை விடுமுறைக்கு பின் நாளை (திங்கட்கிழமை) அனைத்து பள்ளிகளும் திறக்கப்பட உள்ளன. இதையொட்டி பள்ளிகளில் தூய்மை பணிகள் தீவிரமாக மேற்கொள்ளப்பட்டு வருகின்றன. சேலம் மாவட்டத்தை பொறுத்தவரையில் 1, 567 அரசு பள்ளிகள் உள்பட மொத்தம் 2 ஆயிரத்து 396 பள்ளிகள் செயல்பட்டு வருகின்றன.
சேலத்தில் வசித்து கோடை விடுமுறைக்கு சொந்த ஊர்களுக்கு சென்றவர்கள் தற்போது குடும்பத்தினருடன் ஊருக்கு திரும்பி வருகிறார்கள். இதனால் சேலம் புதிய பஸ் நிலையத்தில் பயணிகள் கூட்டம் அதிகமாக காணப்படுகிறது.

இது ஒருபுறம் இருக்க, பள்ளி மாணவ, மாணவிகளுக்கு தேவையான சீருடை, நோட்டு, புத்தகம், புத்தக பைகள் (பேக்குகள்) காலணி, ஷூ மற்றும் எழுது பொருட்கள் போன்ற கல்வி உபகரணங்களை வாங்குவதற்கு நேற்று சேலத்தில் உள்ள ஸ்டேசனரி பொருட்கள் விற்பனை கடைகளில் கூட்டம் அதிகமாக காணப்பட்டது.
குறிப்பாக டி. வி. எஸ். பஸ் நிறுத்தம், பழைய பஸ் நிலையம், புதிய பஸ்நிலையம் எதிரில், கோட்டை பெருமாள் கோவில் செல்லும் வழி, சுவர்ணபுரி, அழகாபுரம், அஸ்தம்பட்டி உள்ளிட்ட பகுதிகளில் உள்ள புத்தக பைகள் (பேக்குகள்) விற்பனை கடைகளில் மாணவ, மாணவிகளின் பெற்றோர்கள் தங்களது குழந்தைகளுக்கு பேக்குகளை தேர்வு செய்து வாங்கி சென்றனர்.
இதனால் அனைத்து கடைகளிலும் ஸ்கூல் பேக் விற்பனை மும்முரமாக நடந்தது.