சுற்றுச்சுவர் இல்லாத பண்ருட்டி கண்டிகை பள்ளி

ஸ்ரீபெரும்புதுார் ஒன்றியம், பண்ருட்டி ஊராட்சிக்குட்பட்ட பண்ருட்டி கண்டிகையில், ஊராட்சி ஒன்றிய தொடக்கப் பள்ளி இயங்கி வருகிறது. இப்பள்ளியில் சுற்றுவட்டாரத்தைச் சேர்ந்த 40க்கும் மேற்பட்ட மாணவ - மாணவியர் பயின்று வருகின்றனர். மேலும், அதே பள்ளி வளாகத்தில், அங்கான்வாடி மையமும் இயங்கி வருகிறது. இந்த நிலையில், இப்பள்ளியில் ஒரு பகுதியில் சுற்றுச்சுவர் இல்லை. இதனால், அருகில் உள்ள புதரில் இருந்து பாம்பு, பூச்சி உள்ளிட்ட விஷ ஜந்துகள் பள்ளி வளாகத்தில் உலாவுகின்றன. இதன் காரணமாக மாணவர்கள் அச்சத்தில் உள்ளனர். மேலும், பள்ளி அருகில் கழிவுநீர் தேங்கி கடும் துர்நாற்றம் வீசுவதால் மாணவர்கள் அவதி அடைந்து வருகின்றனர். எனவே, பாதுகாப்பற்ற சூழல் உள்ள நிலையில், மாணவர்களின் நலன் கருதி, சுற்றுச்சுவர் அமைக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என, மாணவர்களின் பெற்றோர் கோரிக்கை விடுத்துள்ளனர்.