வால்பாறை: குடியிருப்பு பகுதிகளுக்குள் நுழைந்த சிறுத்தை!

வால்பாறை கூட்டுறவு காலனி பகுதியில் ஸ்டாலின் என்பவர் நடத்தி வரும் தங்கு விடுதியில் பொருத்தப்பட்டிருந்த சிசிடிவி கேமராவில் சிறுத்தை நடமாடியது பதிவாகியுள்ளது. நேற்று முன்தினம் இரவு சுமார் 2 மணியளவில் சிறுத்தை ஒன்று பிரதான சாலையில் நடந்து வந்து, தங்கு விடுதி வளாகத்திற்குள் நுழைந்து, கட்டத்தில் ஏறிச் சென்றதாக தெரியவந்துள்ளது. வீட்டில் இருந்தவர்கள் ஏதோ சத்தம் கேட்டதை அடுத்து சிசிடிவி காட்சிகளை பார்த்தபோது, சிறுத்தை நடமாடியதை கண்டு அதிர்ச்சி அடைந்துள்ளனர். குடியிருப்பு பகுதிக்குள் சிறுத்தை நுழைந்ததால் மக்கள் பெரும் அச்சத்தில் உள்ளனர். குடியிருப்புக்குள் நுழையும் சிறுத்தையை கூண்டு வைத்து பிடிக்க வேண்டும் என்று உள்ளூர் மக்கள் வனத்துறையிடம் நேற்று கோரிக்கை விடுத்துள்ளனர்.