கோவை: வீடு தீப்பிடித்து எரிந்து விபத்து (VIDEO)

சூலூர் கந்தசாமி வீதியில் நேற்று மின் கசிவு காரணமாக ஒரு வீடு தீப்பிடித்து எரிந்தது. தேவன் என்பவருக்கு சொந்தமான இந்த வீடு கடந்த 8 மாதங்களாக காலியாக இருந்தது. வீட்டில் இருந்த பழைய மின் வயர்கள் மூலம் ஏற்பட்ட கசிவே தீ விபத்திற்கு காரணம் என கூறப்படுகிறது. தீ விபத்தை அறிந்த அக்கம்பக்கத்தினர் உடனடியாக காவல்துறைக்கும், சூலூர் தீயணைப்புத் துறைக்கும் தகவல் அளித்தனர். 

தகவலின் பேரில், தீயணைப்புத் துறை நிலைய அலுவலர் பாலசுப்பிரமணியம் தலைமையிலான குழுவினர் சம்பவ இடத்திற்கு விரைந்து வந்து தீயை அணைத்தனர். இந்த விபத்தில் வீட்டின் மேற்கூரை மற்றும் பழைய பொருட்கள் மட்டுமே சேதமடைந்தன. வீடு காலியாக இருந்ததால் உயிர் சேதம் தவிர்க்கப்பட்டது. சூலூர் பேரூராட்சித் தலைவர் தேவி மன்னவன், உதவி தலைவர் கணேஷ், கிராம நிர்வாக அலுவலர், உதவி மின் பொறியாளர் சரவணன் மற்றும் மின் நிலைய ஊழியர்கள் சம்பவ இடத்திற்கு வந்து விபத்துக்கான காரணத்தை கேட்டறிந்தனர்.