வேலூர் மாவட்டத்தில் சாராயம் மற்றும் கள்ளச்சந்தையில் மது விற்பனையை தடுக்க நடவடிக்கை எடுக்கும்படி எஸ்பி மணிவண்ணன் உத்தரவிட்டார். அதன்பேரில் வேலூர், காட்பாடி, குடியாத்தம் ஆகிய உட்கோட்டங்களில் மதுவிலக்கு அமலாக்கப்பிரிவு, சட்டம்-ஒழுங்கு பிரிவு போலீஸ் இன்ஸ்பெக்டர் தலைமையிலான போலீசார் சோதனை மற்றும் ரோந்து பணியில் ஈடுபட்டனர்.
இதில் 200 லிட்டர் சாராய ஊறல், 5 லிட்டர் சாராயம், 3 லிட்டர் கள், 15 மதுபாட்டில்கள், 250 கிராம் குட்கா பறிமுதல் செய்யப்பட்டன. மது, சாராயம் விற்ற வழக்கில் 14 பேரும், குட்கா விற்ற வழக்கில் ஒருவரும் கைது செய்யப்பட்டு உள்ளனர் என்று போலீஸ் அதிகாரிகள் தெரிவித்தனர்.